Policia e Shtetit në kuadër të operacionit "Kuadrati" ka vendosur sekuestro preventive ndaj një 49-vjeçareje në Fier për pasurinë e saj që arrin vlerën 1.5 mln euro. Në zbatim të vendimit të Gjykatës u bë i mundur sekuestrimi i pasurive të luajtshme e të paluajtshme, ku vlera totale e pasurive të sekuestruara në Vlorë dhe Pogradec kap shifrën e lartë. Konkretisht , një bar restorant në Skelë dhe një apartament në Vlorë, një apartament në Pogradec dhe një automjet tip "Benz". Por policia gjithashtu zbulon se kjo pasuri dyshohet se është grumbulluar nga ish-bashkëshorti i saj që është emër i njohur në botën e krimit. Shumat e konfiskuara dyshohet se janë produkt i veprës penale “Trafikimi i narkotikëve”, për të cilën ish-bashkëshorti i saj, shtetasi Shaban Zenaj, i ekstraduar në Itali është dënuar nga autoritetet italiane me 14 vjet burg. Këto sekuestrime pasurore janë në kuadër të procedimit penal, ndaj shtetasit Shaban Zenaj, si person i dyshuar për kryerjen e veprës penale "Pastrimi i produkteve të veprës penale ose veprimtarisë kriminale". Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe personave të lidhur me të.