Pasuria e miliarderëve u rrit tre herë më shumë vitin e kaluar për të arritur nivelin e saj më të lartë të regjistruar ndonjëherë, duke thelluar ndasitë ekonomike dhe politike që kërcënojnë stabilitetin demokratik, tha të hënën grupi kundër varfërisë Oxfam. Në një raport të publikuar në hapjen e Forumit Ekonomik Botëror në Davos, organizata bamirëse tha se pasuria e miliarderëve globalë u rrit me 16% në vitin 2025 duke arritur në 18.3 trilionë dollarë. Fitimet erdhën edhe pse një në katër persona në të gjithë botën ka vështirësi që të ushqehet rregullisht dhe gati gjysma e popullsisë globale jeton në varfëri. Studimi i Oxfam, i cili mbështetet në kërkime akademike dhe burime të tjera të dhënash, argumenton se bumi i pasurisë po përputhet me një përqendrim dramatik të ndikimit politik, me miliarderët që kanë 4,000 herë më shumë gjasa sesa qytetarët e zakonshëm të mbajnë poste të rëndësishme politike. Grupi e lidh rritjen e fundit të pasurisë me politikat nën Presidentin amerikan Donald Trump, administrata e dytë e të cilit ka ulur taksat, ka mbrojtur korporatat shumëkombëshe nga presioni ndërkombëtar dhe ka lehtësuar mundësinë e krijimit të monopoleve. Vlerësimet në rritje të kompanive të inteligjencës artificiale kanë shtuar fitime të mëtejshme të papritura për investitorët tashmë të pasur. Oxfam u bëri thirrje qeverive të miratojnë plane kombëtare për uljen e pabarazisë, të vendosin taksa më të larta mbi pasurinë ekstreme dhe të forcojnë muret mbrojtëse midis parasë dhe politikës, duke përfshirë frenimin e lobimit dhe financimit të fushatave. Tatimi mbi pasurinë është vendosur vetëm në disa vende si Norvegjia, por vende të tjera, që nga Britania e deri te Franca dhe Italia, lëvizje të ngjashme janë debatuar. Oxfam ndërkohë thotë se 2.5 trilionë dollarë të shtuar në pasurinë e miliarderëve vitin e kaluar janë afërsisht të barabartë me stokun e pasurisë së mbajtur nga 4.1 miliardë njerëzit më të varfër.