Veprat penale të lidhura me pastrimin e parave në Shqipëri kanë prekur nivelin më të lartë në 10 vitet e fundit. Sipas të dhënave zyrtare të INSTAT “Pastrimi i produkteve të veprës penale” arriti në 520 raste gjatë vitit 2025, me një rritje prej 11% krahasuar me një vit më parë. Ky nivel i lartë erdhi pas një periudhe dyvjeçare rënieje, që kishte nisur pas kulmit të mëparshëm prej 509 rastesh në vitin 2022. Në një dokument zyrtar të qeverisë të publikuar për konsultim në tetor të vitit të kaluar, Strategjia Kombëtare për Krimin e Organizuar 2026–2030 pranon se “transaksionet e paligjshme financiare dhe krimet financiare që lidhen me to janë ndikuar nga përshpejtimi i teknologjisë dhe globalizimi” Këto përfshijnë një gamë të gjerë aktivitetesh kriminale, të tilla si pastrimi i parave, evazioni fiskal, korrupsioni, trafiku i drogës dhe trafikimi i qenieve njerëzore. Strategjia sillte në vëmendje disa nga format e rrezikut të pastrimit të parave të identifikuara në Shqipëri duke i grupuar ato, shkruan revista Monitor.