Presidenti Donald Trump ka premtuar operacionin më të madh të deportimeve në historinë e Shteteve të Bashkuara. Në një analizë të ‘The Economist’ thuhet se fushata e deportimit është jopopullore. Shumica e amerikanëve janë dakord me dëbimin e kriminelëve, por jo me shkatërrimin e familjeve të njerëzve punëtorë që kanë jetuar në vend për dekada të tëra. Trump po e ndryshon trajektoren demografike të Amerikës. Migrimi neto në vitin 2025 ishte thuajse zero. Forca punëtore është tkurrur me 1 milion që nga janari. Ndërkohë është shkaktuar një kosto prej 17,000 dollarësh për person për përpunimin, prangosjen dhe deportimin e emigrantëve të paligjshëm dhe shumë biznese po fillojnë të ndjejnë mungesat e para të fuqisë punëtore. Efektet afatgjata mund të jenë edhe më të dëmshme. Edhe pse Trump ka thënë shpesh se favorizon migrimin e ligjshëm, veçanërisht atë të specialistëve të kualifikuar, veprimet e tij sugjerojnë të kundërtën. Ai po pengon vazhdimisht rrugën përmes së cilës të huajt mund të vijnë për të studiuar dhe punuar. Sipas një vlerësimi, 29% më pak viza studentore u lëshuan në vitin 2025 sesa në vitin e kaluar, dhe rregullat e reja po e bëjnë studimin në Amerikë edhe më pak tërheqës. Të huajt duhet të përfundojnë kurset e tyre në më pak kohë sesa një student mesatar dhe pastaj të gjejnë një punë brenda 30 ditëve ose të kthehen në shtëpi. Ndërkohë, firmat amerikane që duan viza H 1- B për stafin e huaj shumë të kualifikuar do të duhet të paguajnë më shumë se 100,000 dollarë për punëtor për të aplikuar dhe prapëseprapë mund të refuzohen. Politika kufizuese e Trump për emigracionin bie ndesh me mënyrën sesi është krijuar ekonomia amerikane ndër vite. Pothuajse gjysma e firmave Fortune 500 u themeluan nga emigrantë ose nga fëmijët e tyre. Shumë nga sipërmarrësit më të sukseshëm të Amerikës, përfshirë Elon Musk, kanë emigruar për studime drejt Shteteve të Bashkuara. Sipas eksepertëve, reformat në fushën e emigracionit do të duhet të shkonin në drejtimin e hapjes së dyerve për njerëzit më të talentuar në botë. Kjo mund ta bëjë vërtet Amerikën përsëri të madhe.