Inspektorati Kombëtar i Mbrojtjes së Territorit ka ndëshkuar 65 subjekte me gjobë dhe pezullim punimesh në kuadër të respektimit të sigurisë teknike në kantierë. Në territorin e Bashkisë së Tiranës janë verifikuar në total 219 objekte ndërtimi prej të cilave 41 me leje nga Këshilli Kombëtar i Territorit dhe 178 objekte me leje nga njësia vendore. Në përfundim të rikontrollit, në 45 kantiere ka rezultuar që nuk janë marrë masat e duhura për sigurinë. Në këto subjekte u pezullua puna dhe u vendos gjobë. Në zonën e Golemit janë verifikuar 73 subjekte, ku 8 prej të cilave janë ndëshkuar me gjobë dhe vendim pezullim punimesh. Në Vlorë deri më tani janë inspektuar 32 objekte ndërtimi, ku në 12 raste janë vendosur gjoba dhe janë pezulluar punimet. Në territorin e Bashkisë Himarë rezultojnë gjithsej 71 subjekte të pajisura me leje nga KKT, të cilat janë planifikuar për t’u inspektuar. Deri në këtë fazë janë inspektuar 14 subjekte. Procesi i verifikimit planifikon të shtrihet edhe në territorin e Bashkisë së Durrësit dhe gradualisht në të gjithë vendin.