Byroja Kombëtare e Hetimit, si një prej strukturave më të domosdoshme për Prokurorinë Speciale SPAK dhe pjesë e Drejtësisë së re është në fazën e kompletimit të saj. Pas përfundimit të testimit teorik dhe fizik dhe testit të poligrafisë, tashmë për kandidatët e përzgjedhur ka nisur procesi i vettingut. Madje, burimet bëjnë me dije se ky process do të bëhet me shpejtësi për të mos penguar nisjen e punës së kësaj strukture dhe SPAK në tërësi. Kandidatët e kualifikuar, do të plotësojnë deklaratën e pasurisë dhe interesave private të kandidatit për pozicione të ndryshme në institucionet e sistemit të drejtësisë. Aplikantët kishin afat deri më dy dhjetor për të dorëzuar deklaratën e pasurisë, të plotësuar. Faza e Intervistës u zhvillua nën vëzhgimin dhe monitorimin e Komisionit Ndërkombëtar të Ekspertëve, të caktuar nga misionet e Qeverisë së Shteteve të Bashkuara të Amerikës dhe Bashkimit Evropian në Shqipëri. Pas përfundimit të të gjitha detyrimeve sipas ligjit do të përzgjedhurit do të trajnohen në Virxhinia të Shteteve të Bashkuara të Amerikës me lektorë nga FBI amerikane.