Parashutistët britanikë që rikrijuan skenat e hedhjes me parashuta nga një avion përtej vijave të mbrojtjes gjermane, në përvjetorin e 80-të të asaj që njihet tashmë si D-Day, u pritën nga zyrtarët francezë të doganave në një postbllok kufitar të improvizuar. Pak çaste pasi parashutistët prekën tokën dhe mblodhën pajisjet e tyre, ata u vendosën në radhë njëri pas tjetrit dhe nisën të dorëzonin pasaportat e tyre në duart e zyrtarëve francezë të doganave, në një fushë të Normandisë. Rreth 320 parashutistë britanikë, belgë dhe amerikanë morën pjesë në manifestimin e të mërkurës, që inskenonte ngjarjet e 6 qershorit 1944. “Është diçka që nuk e kemi përjetuar më parë”, tha Mark Berry, komandanti i parashutistëve britanikë, për gazetën The Sun. “Por duke pasur parasysh mikpritjen e jashtëzakonshme me të cilën u përballëm në cdo drejtim tjetër, duket se ky ishte një cmim i vogël për të paguar për ardhjen tonë në francë”, shtoi ai. Që kur Britania u largua nga Bashkimi Evropian, qytetarët e saj nuk kanë më të drejtë të lëvizin lirshëm brenda bllokut dhe përballen me kontrolle më të rrepta të imigracionit. Parashutistët britanikë u hodhën nga tre avionë ushtarakë A400M mbi Sannerville, duke pasqyruar aksionin e tetë dekadave më parë. Agimin e 6 qershorit 1944, mijëra forca ajrore aleate u hodhën me parashuta në zonat e zbarkimit përgjatë bregut të Normandisë. Trupat tokësore më pas zbarkuan në pesë plazhe. Parashutistët u hodhën pas linjave gjermane, me mision thyerjen e tyre, kapjen e urave strategjike dhe vendosjen e pozicioneve mbrojtëse. Ata u përballën me sfida orientimi në errësirë dhe disa madje u vunë nën zjarrin e fortë të armikut.