Mban mend vetëm shpërthimin para se të thithej nga dritarja e avionit. Ljubisa Karovic tregon se zhurma e fortë e thyerjes së dritares e zgjoi nga gjumi, në fluturimin e Ryanair nga Greqia në Gjermani. Njëmbëdhjetë ditë dhe 11 netë më vonë, ngjarja e mban ende zgjuar natën. “Shpërthimi është e vetmja gjë që mbaj mend”, thotë sipërmarrësi serb në një intervistë me Guardian. Djegiet dhe plagët në krahun e tij të djathtë, që i ngjiten deri në sqetull dhe gjoks, janë dëshmi e një ngjarjeje që nuk harrohet lehtë: 61-vjeçari u thith nga dritarja e një avioni, në mes të fluturimit, dhe mbijetoi. "Jam me fat," thotë ai. "Nuk mbaj mend shumë dhe koka dhe qafa më dhembin ende, por jam gjallë. Mund të ketë qenë rripi i sigurimit, fakti që isha ende i lidhur. Por ndoshta është fati. Unë besoj në Zot dhe e falënderoj atë çdo ditë." Vetëm 100 orë kanë kaluar që kur Karoviç doli nga spitali. Shoku, thotë ai, ishte i madh, por fakti që ai mund ta tregojë historinë është thjesht një mrekulli. Avokati i tij grek, Vasilis Tsiaras, thotë se ai është "gjallë gabimisht". “Ljubisha ishte mes jetës dhe vdekjes”, thotë ai.