Një fluturim i Qantas nga Melbourne, në Australi, me destinacion Dallasin në SHBA u detyrua të devijonte drejtimin për shkak të një arsyeje shumë të pazakontë. Sipas raporteve të mediave lokale, menjëherë pas ngritjes, një pasagjer kafshoi një asistente fluturimi. Avioni më pas bëri një ndalesë të paplanifikuar në Papeete, kryeqytetin e Polinezisë Franceze. Sipas transmetuesit australian ABC dhe mediave të tjera, burri u bllokua nga pasagjerë të tjerë para se avioni të ulej dhe u mor në paraburgim nga autoritetet lokale pas zbritjes në tokë. Pasi u arrestua, avioni u furnizua me karburant dhe u nis i sigurt për në Shtetet e Bashkuara. Ndërsa motivet që e çuan burrin të kafshonte asistenten e fluturimit ende po sqarohen, Qantas ka mbajtur një qëndrim të vendosur dhe njoftoi se pasagjerit i është ndaluar të fluturojë më me të, përgjithnjë. "Siguria e klientëve dhe stafit tonë është përparësia jonë kryesore dhe ne kemi tolerancë zero për sjellje kërcënuese ose agresive në bord", tha një zëdhënës i kompanisë.