Pasi Talat Xhaferi do të drejtojë qeverinë e përkohshme në Maqedoninë e Veriut, BDI-ja synon që të bëjë edhe Presidentin e parë shqiptar. Zëdhënësi i BDI-së Bujar Osmani tha se misioni i radhës i BDI është Presidenti. “Kryeministria do të jetë pjesë zhbërjeve etnike. Pastaj ka mbetur vetëm një pjesë, ajo e Presidentit të shtetit që do të jetë misioni i ardhshëm i BDI-së. Ky është vizioni i Ali Ahmetit, ku mandat pas mandati, kapitull pas kapitulli, pjesë për pjesë që përbën mozaikun e tij. Shtet i komuniteteve të barabarta”, tha Osmani. Teksa ligji në Maqedoninë e Veriut parashikon që 100 ditë para mbajtjes së zgjedhjeve parlamentare, vendi të drejtohet nga një qeveri e përkohshme, një ditë më parë u vendos që shqiptari Talat Xhaferi do të drejtojë qeverinë e përkohshme në Maqedoninë e Veriut. Ky vendim u mor 100 ditë para zgjedhjeve parlamentare, të caktuara për t’u mbajtur më 8 maj të vitit 2024.