Komisioni Qëndror i Zgjedhjeve ka gjobitur me 10 mijë lekë kryetarin në detyrë të Bashkisë së Vorës, Gentian Picari. Ai është gjobitur për mosdeklarim të aktiviteteve në faqen zyrtare të Bashkisë. Vendimi është marrë në mbledhjen e Komisionit Qëndror të Zgjedhjeve. KQZ ndërmori këtë veprim pas akuzave të ngritura nga LSI për shpërdorim detyre. Ndërkohë, kreu i Bashkisë së Vorës ka të drejtë që brenda 8 ditëve që nga publikimi i këtij vendimi të apelojë në KAS. LSI e akuzoi Picarin se nuk kishte dhënë informacione se ku do të vendoseshin materialet zgjedhore në faqen e Bashkisë, siç në fakt e parashikon Kodi Zgjedhor. Gentian Picari u caktua nga këshilli bashkiak si kryetar në detyrë I bashkisë së Vorës pas shkarkimit të Agim Kajmakut nga Komisioni Qendror i Zgjedhjeve, pasi ky i fundit ishte subjekt i ligjit të Dekriminalizimit.