Firmosja e marrëveshjes për reformën zgjedhore mes palëve politike në Shqipëri, që u arrit me këmbënguljen e fortë të ndërkombëtarëve në Shqipëri është shoqëruar paraditen e kësaj të diele me një mbledhje të Kryesisë së Partisë Demokratike. Në fund të saj, kryetari Lulzim Basha në një deklaratë për mediat foli për fitore në zgjedhjet e ardhshme. “Opozita do t’i fitojë këto zgjedhje dhe do iu kthejë ekonominë shqiptarëve, pasi kjo qeveri ka zhvatur Shqipërinë. Opozita e bashkuar do të paraqë platformën ekonomike kudo në Shqipëri. Sfida më e madhe e çdo familje, sfida e madhe e çdo shqiptari sot është kriza ekonomike. Dhe kjo sfidë nuk mund të zgjidhet nga ata që e shkaktuan këtë krizë të thellë ekonomike duke e varfëruar, zhvatur dhe taksuar Shqipërinë në këto 7 vite. Ndaj e gjithë vëmendja jonë, i gjithë fokusi ynë, i gjithë përqendrimi ynë tani është tek e ardhmja. Është te një ekonomi e fortë dhe një Shqipëri e fortë. Basha e vuri theksin tek ekonomia dhe foli për mirëqenien e shqiptarëve përmes ngritjes së vendeve të punës.