Policia e Shkodrës ka parandaluar përshkallëzimin e një konflikti me armë zjarri. Një 17 vjeçar është konfliktuar për motive të dobëta me një bashkëmoshatare të tij. Mësohet se shkaku i konfliktit midis tyre ka qenë fakti se 17 vjeçari i hapte llogari false në rrjete sociale, me të dhënat dhe fotot e saj private. Autoritetet policore bëjnë me dije se ky shtetas ka qëlluar me armë zjarri në drejtim të banesës së vajzës. Falë veprimeve të shpejta hetimore, shërbimet policore arrestuan në flagrancë 17 vjeçarin. Gjatë kontrollit në banesën e tij është gjetur dhe sekuestruar një armë zjarri pushkë, me të cilën dyshohet se ka gjuajtuar në drejtim të banesës së bashkëmoshatares së tij. Materialet iu referuan Prokurorisë së Rrethit Gjyqësor Shkodër, për veprat penale “Ndërhyrja në të dhënat kompjuterike“, “Kanosja“, “Armëmbajtja pa leje” dhe “Prishja e qetësisë publike”. Ndërkohë në Kurbin është finalizuar operacioni policor i koduar “Poligoni” si rezultat i të cilit, janë arrestuar tre shtetas posedues të armëve të zjarrit dhe autorë të dyshuar të tentativës për kultivim të bimëve narkotike.