Kjo ka qenë deklarata e kryeministrit Rama, lidhur me ata që kanë përgjegjësi për rekrutimet. Ndërkohë, ditët e paskthimit nga Siria do të shoqërohen edhe me veprime të tjera nga prokuroria e posacme SPAK. Burimet bëjnë me dije se edhe Floresha Rasha, pasi të kalojë problemet me shëndetin do të merret në pyetje për të zbuluar se kush janë rekrutuesit, financuesit dhe njerëzit që i kanë kaluar ata nga Shqipëria, në Turqi, me destinacion final Sirinë. Sipas një raporti, nga viti 2012 më shumë se 100 shqiptarë, kryesisht djem të rinj, i janë bashkuar grupeve të xhihadistëve që luftojnë në Siri. Pothuajse të gjithë iu bashkuan Al Nusrës-krahu ushtarak i Al Kaedas ose ISIS-it. Sipas burimeve të Shërbimit Informativ Shtetëror, pjesa më e madhe ishin radikalizuar dhe rekrutuar në xhami jashtë kontrollit të KMSH-së. Futja e këtyre xhamive nën kontrollin e Komunitetit Mysliman Shqiptar është kthyer në një prioritet kryesor për Shqipërinë. Në shkurt 2014, parlamenti miratoi paketën ligjore që e bënte, në pjesën më të madhe të rasteve, pjesëmarrjen në konflikte të armatosura dhe bashkimin në grupe ushtarake në vende të huaja një vepër penale të ndëshkueshme deri në 8 vjet burg. Shqiptarët tani rrezikojnë deri në 15 vjet burg për nxitje, rekrutim, financim dhe mbështetje të të tjerëve në konflikte të huaja.