Japonia dhe Koreja e Jugut janë dy ndalesat e shefit të ekzekutivit, Edi Rama, i cili gjatë kësaj jave do të ketë takime të nivelit të lartë për thellimin e bashkëpunimit me vendet aziatike. Gjatë qëndrimit në Seul, Kryeministri Rama do takohet me homologun e tij Korean, Kim Minseok si dhe me shefin ekzekutiv të kompanisë Samsung. Po ashtu, ai do të jetë i ftuar i veçantë në panelin me temë “Bisedë me një udhëheqës: Një epokë e transformimit të madh: strategjia e madhe e një kombi të vogël”, ku do të trajtojë sfidat e reja globale nga perspektiva e Ballkanit Perëndimor. Më 21 maj, Rama do të udhëtojë drejt Tokios ku do të pritet në mënyrë ceremoniale. Kryeministri do të zhvillojë një takim me homologun e tij japonez si dhe me Kryetarin e Dhomës së Përfaqësuesve. Gjatë qëndrimit, Rama pritet të vizitojë edhe Universitetin e Kombeve të Bashkuara në Tokio, ku do t’u drejtohet pjesëmarrësve në një panel diskutimi me titull “Rruga e Shqipërisë drejt Anëtarësimit në BE: Roli i Japonisë”.