Nuk ka humbur kohë, por LSI është hedhur në sulm menjëhërë pas largimit të një prej figurave kryesore të saj ish ministrit dhe ish deputetit Nasip Naço drejt PS. Në një takim me drejtues të njësisë 8, kryetarja e LSI Monika Kryemadhi është shfaqur përkrah profesorit socialist Petrit Bare. Kryemadhi e ka prezantuar Baren ne takim si afrimin më të ri me partinë që ajo drejton. Gjatë takimit Petrit Bare ka vlerësuar platformën dhe mbështetjen që LSi i ka dhënë jetës akademike në vend. “Platforma dhe mbështetja e LSI-së ka qenë për jetën akademike universitare tërë kohën. Luftë për ligjin e pazbatueshëm nga Universiteti, sepse unë kam qenë dekan për 17 vjet, pedagog 50 vjet dhe vazhdoj të jem akoma në jetën akademike dhe mbështetjen ja ka dhënë vetëm LSI-ja”, tha Bare në këtë takim. Kryemadhi gjatë bisedës sulmoi sërish kryeministrin Edi Rama, që sipas saj, në vend që të merret me çështjet e përmbytjeve dhe pandemisë shëtit nëpër botë. “Tani aktualisht që ne flasim, e gjithë Shqipëria po përmbytet nga shirat, ku e kemi kryeministrin? Kryeministri ka dalë xhiro, po kërkon azil politik për veten e tij. në vend që të jetë në krye të detyrës, në vend që të vërë institucionet për të ndihmuar ato familje dhe biznese që përmbyten. Pra Shqipëria është e përmbytur e gjitha. Pandemia në një anë, që ka shkatërruar, nga ana tjetër shkatërrimi i ekonomisë që vjen nëpërmjet përmbytjeve, në një anë tjetër kemi nj izolim total të Shqipërisë. Varfëria çdo ditë e më shumë ndikon dhe bëhet prezente në tryezat e shqiptarëve”