Pas fitores së thellë të zgjedhjeve paraprake në Ajova, ish Presidenti Donald Trump u ul në një sallë gjyqi në Nju Jork për t’u përballur me akuzat për shpifje nga shkrimtarja E Jean Carroll (E Xhin Keroll), pasi ajo e akuzon atë për dhunë seksuale disa dekada më parë. Trump shikonte nga tavolina e të pandehurit ndërsa avokatja e Carroll i tha një jurie se ish Presidenti Trump ia bëri asaj jetën të vështirë në vitin 2019, pasi ajo publikoi historinë e saj për një sulm seksual në dhomat e zhveshjes së një dyqani në Manhattan. “Ai përdori mikrofonin më të madh në botë për të sulmuar klienten time, për të denigruar dhe për dëmtuar reputacionin e saj”, tha avokatja. Carroll, 80 vjeç, kërkon një dëmshpërblim prej të paktën 10 milionë dollarësh në këtë aktpadi, që sjell vëmendjen tek akuza për sulm seksual, ndërsa Trump po bën fushatë për të siguruar emërimin e partisë republikane si kandidat i saj për president në zgjedhjet e nëntorit. Juria do të shqyrtojë vetëm shumën e dëmshpërblimit që Trump duhet t'i japë Carroll, jo vërtetësinë e akuzës për sulm seksual apo nëse Trump gjenjeu lidhur me këtë akuzë. Menjëherë pas përfundimit të seancës gjyqësore, Trump akuzoi gjykatësin Kaplan për anshmëri politike ndaj tij ashtu sic ka bërë edhe në rastet e padive të tjera ndaj tij. Ish Presidenti Trump mund të kalojë më shumë se një vit duke lëvizur mes sallave të gjyqit dhe fushatës, ndërsa përpiqet të sigurojë emërimin e partisë republikane si kandidat i saj në zgjedhjet presidenciale të nëntorit. Ai fitoi zgjjedhjet paraprake në shtetin e Ajovës të hënën me një diferencë të madhe me rivalët dhe anketimet tregojnë se ai kryeson edhe në garën e radhës në Nju Hempshër. Ish Presidenti Trump nuk e ka pranuar fajësinë në katër çështje të tjera penale, të cilat mund ta çojnë atë në burg përpara zgjedhjeve të presidenciale të nëntorit, duke përfshirë dy akuza për përpjekje për të përmbysur rezultatin e zgjedhjeve të vitit 2020, të cilat i fitoi rivali i tij demokrat Joe Biden.