Lituania rihapi aeroportin e Vilniusit, më të madhin dhe më të ngarkuarin në vend, pas orësh pezullime dhe devijime fluturimesh të shkaktuara nga raportimet për balona në hapësirën e saj ajrore që prekën mijëra udhëtarë, tha operatori i aeroportit. Aviacioni evropian është zhytur në kaos javët e fundit nga pamjet e dronëve dhe ndërhyrjet ajrore, duke përfshirë edhe aeroportet në Kopenhagen dhe Mynih. Trafiku ajror në Vilnius rinisi në orën 4:50 minuta të mëngjesit të së dielës pasi u mor një vendim të shtunën vonë për të mbyllur hapësirën ajrore "për shkak të një serie balonash të drejtuara për në Aeroportin e Vilniusit", tha operatori në një deklaratë në faqen e tij në Facebook. Kufizimet e përkohshme ndikuan si në fluturimet në ardhje ashtu edhe në ato në nisje, me disa fluturime që u anuluan, tha operatori. Në total, rreth 30 fluturime dhe gati 6,000 pasagjerë u prekën, shtoi ai. Transmetuesi publik i Lituanisë, LRT, citoi kreun e Menaxhimit Kombëtar të Krizave të vendit të thoshte të shtunën vonë se 13 balona po shkonin drejt aeroportit të Vilniusit. Sipas njoftimeve të postuara në faqen e internetit të Administratës Federale të Aviacionit të SHBA-së, kufizimet u ndërmorën për shkak të "fluturimeve të balonave me ajër të nxehtë". Nuk ishte menjëherë e qartë se kush i nisi balonat dhe të çfarë lloji ishin ato. Aeroporti i Vilniusit tha se edhe gjatë të dielës, mund të ketë vonesa të fluturimeve. Gjatë natës, shumica e fluturimeve hyrëse u ridrejtuan për në Letoninë dhe Poloninë fqinje, ndërsa nisjet u anuluan. Një fluturim që duhej të mbërrinte nga Kopenhageni u kthye në Danimarkë. Lituania, anëtare e NATO-s, në gusht shpalli një zonë ndalim-fluturimi prej 90 kilometrash, paralel me kufirin me Bjellorusinë, në përgjigje të dronëve që hynin nga atje, duke thënë se kjo do t'i lejonte forcave të saj të armatosura të reagonin ndaj shkeljeve. Lituania, një mbështetëse e fortë e Ukrainës, ndan një kufi prej 679 km me Bjellorusinë, një aleate e ngushtë e Rusisë. Kryeqyteti Vilnius ndodhet afërsisht 30 km larg kufirit.