Avioni i ushtrisë amerikane, me të cilin kreu i CIA-s, Uilliam Bërns udhëtoi për në Sarajevë dhe më pas në Beograd është ulur në aeroportin e Prishtinës, Adem Jashari. Interesimi i mediave pranë Ambasadës së SHBA në Kosovë dhe institucioneve qendrore në Prishtinë nuk ka marrë përgjigje. Megjithatë, Top Channel siguroi pamjet kur autokolona me makina që shoqëronte Bërns mbërriti në Kuvendin e Kosovës. Kreu i CIA-s zbriti prej automjeteve dhe u fut në ambientet e brendshme të Kuvendit. As nga Ambasada e SHBA në Prishtinë dhe as nga institucionet e Kosovës nuk ka një deklaratë zyrtare, por besohet se kreu i CIA-s është takuar me Presidenten Vjosa Osmani. Kjo është ndalesa e radhës e shefit të CIA-s në rajon. Në Bosnje, ai u takua me homologët e tij nga sektori i inteligjencës, me anëtarët e Presidencës së këtij shteti dhe me ministrin e Jashtëm. Një zyrtar i Qeverisë amerikane, i cili foli në kushte anonimiteti për Radio Evropa e Lirë tha se arsyeja e vizitës së shefit të CIA-s në Sarajevë, ndër të tjera ishte edhe për shkak të retorikës separatiste të presidentit prorus të entitetit të Republikës Sërpska, Milorad Dodik. Ndërkohë, vizita e kreut të CIA-s në Beograd, as është konfirmuar, por as është mohuar nga zyrtarët në Serbi dhe nga vetë përfaqësuesit e SHBA.