Për dosjen e tjetërsimit të pronave në bregdet, me kërkesë të prokurorisë së posaçme, Gjykata e posaçme antikorrupsion caktoi masën e sigurisë “arrest me burg” për Jorgo Goron, kryetarin në detyrë të bashkisë së Himarrës dhe Stavri Mëhillit. Ndërkohë masa “arrest shtëpie” është caktuar për Jerasimo Bashi me detyrë Drejtor i Drejtorisë së Mbrojtjes dhe Menaxhimit të Tokës, Bilbil Aliaj me detyrë Drejtor i ASHK-së Drejtoria Vendore Vlorë dhe Vezir Gjikoka me detyrë Jurist pranë ASHK-së. Kallëzimi për tjetërsimin e pronave u bë nga Fredi Beleri, i cili qëndron pas hekurave për shitblerje votash. Në njoftimin e Prokurorisë së Posaçme thuhet se Jorgo Goro në bashkëpunim me Jerasimo Bashin pa bërë asnjë verifikim konkret sipas detyrimeve ligjore, kanë përcjellë pranë organeve kompetente dokumente tërësisht të falsifikuara duke bërë të mundur më pas regjistrimin e një sipërfaqe prej 5512 m2 tokë bujqësore në pronësi shtet, në favor të subjektit privat. Kjo sipërfaqe toke e ndodhur në Dhërmi, falë veprimeve të kundërligjshme të Bilbil Aliaj dhe Vezir Gjikoka është tjetërsuar në favor të një subjekti privat, duke zhveshur shtetin nga pronësia mbi të. Ky tjetërsim është shoqëruar me përftim material të padrejtë për Stavri Mëhillin. Aktualisht kjo sipërfaqe tokë bujqësore rezulton e sekuestruar me vendim të Gjykatës së Posaçme Antikorrupsion. Në një episod të dytë, Jorgo Goro në bashkëpunim me Jerasimo Bashin ka realizuar me veprime konkrete zhvendosjen faktike në terren të një sipërfaqe tokë bujqësore prej 5080 m2, duke ja mbivendosur atë një pasurie tjetër në pronësi të shtetit. Goro ka tejkaluar të gjitha kompetencat që ligji i njeh, duke u shprehur për ekzistencën e një mbivendosje pasurish të paluajtshme në terren dhe më pas duke konfirmuar një plan vendosje, e cila rezulton të ketë shërbyer jo vetëm për transaksionet e mëpasshme ndërmjet subjekteve të ndryshëm por edhe për zhvillimin e pronës, përfshirë këtu pajisjen me leje ndërtimi për një kompleks turistik në emër të një shoqërie tregtare, i cili do të ndërtohet mbi të dyja sipërfaqet në fjalë të cilat janë kufitare.