Rusia po krijon një "partneritet të plotë" me talebanët në pushtet në Afganistan dhe po inkurajon vendet e tjera në rajon të zgjerojnë bashkëpunimin me Kabulin, tha të enjten një zyrtar i lartë rus i sigurisë. Rusia vitin e kaluar u bë vendi i parë që njohu zyrtarisht qeverinë islamike të talebanëve që mori pushtetin në gusht 2021, ndërsa forcat e udhëhequra nga SHBA-të organizuan një tërheqje kaotike nga Afganistani pas 20 vitesh luftë atje. Agjencia e lajmeve Interfax citoi ish ministrin rus të mbrojtjes, Sergei Shoigu të thoshte se bashkëpunimi me Kabulin ishte i rëndësishëm për sigurinë dhe zhvillimin e rajonit. Shoigu, i cili është aktualisht sekretar i Këshillit të Sigurisë së Rusisë, tha se Moska po ndërtonte një "dialog pragmatik" me talebanët që përfshinte sigurinë, tregtinë, kulturën dhe mbështetjen humanitare. Ai foli në një takim me homologët e tij nga Organizata e Bashkëpunimit të Shangait, një grupim me 10 anëtarë që përfshin Kinën, Indinë, Iranin, Pakistanin dhe një numër ish-shtetesh sovjetike. Shoigu shtoi se Organizata duhet të ringjallë grupin e saj të kontaktit me Afganistanin. Talebanët u shpallën të jashtëligjshëm nga Rusia si një lëvizje terroriste në vitin 2003, por vendimi u tërhoq në prill të vitit 2025. Rusia sheh nevojën për të bashkëpunuar me Kabulin, pasi përballet me një kërcënim të madh sigurie nga grupet militante islamike me bazë në një sërë vendesh nga Afganistani në Lindjen e Mesme.