Fenomenti i inflacionit politik në Shqipëri, ka prodhuar një numër të lartë partish politike të regjistruara në gjykatën e Tiranës, por një pjesë e konsiderueshme e tyre rezultojnë të jenë ‘fantazëm’, pa një adresë konkrete, pa mundësi reale për t’ju audituar fondet. Madje ka dhe nga ato subjekte politike që pavarësisht se kanë një adresë të saktë, në bilancin financiar deklarojnë zero shpenzime dhe zero të ardhura, pra praktikisht nuk bëjnë asnjë aktivitet politik. Raporti vjetor i Komisionit Qëndror të Zgjedhjeve tregon se në vitin 2024, në gjykatë kanë qenë të regjistruara 132 parti politike, por vetëm 50 prej tyre kanë dorëzuar raportet financiare. 81 parti kanë deklaruar adresa të pasakta, prandaj ka qenë e pamundur të auditohen. Nëntë parti deklarojnë zero të ardhura dhe shpenzime dhe nëntë janë me status pasiv. Ndërkohë dy parti nuk kanë pasur mundësi të paguajnë shërbimin e audituesve ligjorë.