Policia ka pezulluar dhe referuar materialet në prokurori për tre efektivë të policisë së Vlorës me akuzat e shpërdorimit të detyrës në lidhje me parcelën me hashash të asgjësuar në fshatin Bishan të njësisë administrative Novoselë. Gjatë operacionit të policisë u asgjësuan me anë të djegies gati 5 mijë bimë kanabis të kultivuara brenda një parcele me misër. Punonjësit e pezulluar të policisë janë dy nënkomisarët K.P., me detyrë shef seksioni për krimet në komisariatin e Vlorës dhe F.M., me detyrë specialist për hetimin e krimmeve po në këtë komisariat. Në pranga përfunduan autorët e dyshuar të kultivimit të bimës narkotike, Skënder Llanaj dhe Danielo Llanaj, babë e bir si dhe kryeplaku i fshatit, Bujar Hoxhaj. Veç bimëve të asgjësuara, policia ka sekuestruar në cilësinë e provës materiale gati 200 kilogramë kanabis në proces tharjeje, 1 armë gjahu dhe sasi fishekësh luftarakë.