Bashkimi Europian ka shpenzuar pothuajse 200 milionë euro për të mbështetur zgjedhjet në të gjithë Afrikën që nga viti 2019. Por, sipas një artikulli të publikuar në “Follow the Money” këto para më shumë sesa kanë forcuar demokracinë, kanë shkuar në favor të forcimit të liderëve autokratë dhe të korruptuar. “Ne jemi të përkushtuar të organizojmë zgjedhjet më të mira ndonjëherë.” Ky ishte premtimi i Komisionit të Pavarur Kombëtar Zgjedhor të Nigerisë përpara zgjedhjeve presidenciale të vitit 2023 në vend. Makineri biometrike moderne votimi dhe një portal online do t’u mundësonin qytetarëve të ndiqnin rezultatet në kohë reale sapo të mbylleshin qendrat e votimit. Në një vend ku zgjedhjet prej kohësh janë shoqëruar me akuza për manipulim elektoral, votimi i vitit 2023 u mendua të ishte një pikë kthese: një proces i lirë, i drejtë, i besueshëm dhe gjithëpërfshirës. Por në momentin vendimtar, teknologjia dështoi. Më 25 shkurt 2023, sistemi për ngarkimin e rezultateve menjëherë pas mbylljes së votimit nuk funksionoi siç ishte planifikuar. Shumë votues mbetën skeptikë ndaj këtij dështimi.