Bojkoti dyorësh i avokatëve këtë të premte ka ndikuar në zhvillimin e seancave gjyqësore në Gjykatën e Durrësit. Protesta e zhvilluar ka sjellë shtyrjen e një pjese të seancave të planifikuara, ndërsa çështjet urgjente kanë vijuar sipas parashikimeve. Burime nga Gjykata e Durrësit bëjnë me dije se në seksionin penal, gjatë dy orëve të bojkotit, ishin planifikuar 7 seanca, ku u zhvilluan vetëm ato me karakter urgjent. Bojkoti i avokatëve është zhvilluar si formë proteste pas plagosjes së avokatit Elton Shllaku në Durrës, dy ditë më parë. Shllaku u plagos në një lokal në shëtitoren bregdetare “Taulantia”, ngjarje që ka sjellë reagim dhe shqetësim në radhët e avokatëve. Përmes bojkotit, avokatët kanë kërkuar rritjen e sigurisë gjatë ushtrimit të profesionit dhe marrjen e masave pas incidentit. Ndërkohë, organet ligjzbatuese vijojnë hetimet për rrethanat e plagosjes së avokatit dhe përgjegjësit për ngjarjen.