Fermerët gjermanë filluan një tjetër marshim të madh këtë të hënë, në shenjë proteste ndaj planeve të koalicionit qeveritar për të bërë shkurtime buxhetore dhe rritur disa taksa ndaj fermave. Kolona me traktorë dhe kamionë bujqësorë, si dhe disa pankarta proteste ku shkruhej "pa fermerë, pa ushqim, pa të ardhme", kaluan nëpër rrugët gjermane në temperaturat nën zero. Në Berlin, një linjë me dhjetëra traktorë bllokoi bulevardin kryesor që të çon në Portën e Brandenburgut. Sipas njoftimeve të policisë, rrugët dhe bypass-et janë bllokuar në shumë vende në të gjithë Gjermaninë, duke shkaktuar bllokime trafiku gjatë orës së pikut të mëngjesit. Fermerët janë zotuar të bllokojnë trafikun dhe rrugët kryesore të transportit deri në javën e ardhshme pasi paralajmërojnë se ndalja e subvencioneve do t'i bëjë fermat të paqëndrueshme. Kreu i sindikatës gjermane të fermerëve, Joachim Rukwied, në një intervistë të publikuar të hënën, i ka bërë thirrje publikut që të qëndrojë pranë fermerëve.