Administrata amerikane ka paralajmëruar Teheranin ditët e fundit se nuk do të mund të ndalë Izraelin, nëse Irani kryen një tjetër sulm kundër aleatit amerikan, raporton platforma Axios, duke cituar një zyrtar amerikan dhe një ish-zyrtar izraelit, në dijeni me zhvillimet. Pas sulmit të Iranit kundër Izraelit, më 1 tetor, si përgjigje ndaj vrasjes së disa figurave të lidhura me Iranin në Lindje të Mesme, izraelitët janë përgjigjur me sulme mbi shënjestra ushtarake iraniane, ndonëse nuk kanë goditur zonat bërthamore, apo ato për prodhim të naftës. “U kemi thënë iranianëve, nuk do të mund të ndalim më Izraelin, dhe nuk mund të garantojmë që sulmi i radhës do të jetë i kalibruar ashtu si i mëparshmi”, tha një zyrtar amerikan në kushte anonimiteti, sipas platformës Axios. Lideri suprem i Iranit, Ayatollah Ali Khamenei, është zotuar se do të hakmerret kundër sulmeve të Izraelit dhe aleateve të tij, që kanë shënjestruar Teheranin dhe grupet që mbështet ai në rajon.