Top News – Paralajmërime për tërmete apokaliptike / Banorët e Stambollit nisin të braktisin qytetin

Ndërkohë që e gjithë Turqia po përpiqet të shërojë plagët e jashtëzakonshme të shkaktuara nga tërmetet e 6 shkurtit, që deri më tani i kanë marrë jetën mbi 45 mijë personave në Turqi e Siri, vëmendja është kthyer nga pasiguria e zonave të tjera të vendit, e veçanërisht metropoleve të mëdha, për të cilat së fundmi është ngritur shqetësimi se mund të jenë ‘viktimat’ e radhës të ndonjë tërmeti shkatërrimtar. Një prej tyre është pikërisht Stambolli, banorët e të cilit kanë nisur tanimë të interesohen nëse shtëpitë ku ata jetojnë janë të sigurta në rast goditjesh të tilla. Madje shumë banorë kanë lënë banesat dhe kanë nisur të transferohen drejt destinacioneve, që sipas ekspertëve të ndërtimit, janë më të sigurta për të jetuar.