Helene preku tokën në rajonin Big Bend të Floridës si një nga stuhitë më të fuqishme që godet Shtetet e Bashkuara, me zyrtarët që kanë shprehur frikën se uragani do të linte pas një varg vdekjesh dhe shkatërrim total ndërsa lëvizte në brendësi të vendit. Të paktën një viktimë në Florida është konfirmuar si pasojë e uraganit, deri tani, thanë autoritetet, pasi stuhia e kategorisë 4 arriti në tokë rreth orës 23:10 minuta sipas orës lokale. Edhe para mbërritjes së saj, stuhia kishte shkaktuar ndërprerje të energjisë elektrike për mbi 1 milion konsumatorë dhe përmbytje të mëdha në disa zona. Zyrtarët druajnë se më shumë viktima do të konfirmohen të premten pasi stuhia shpërtheu me erëra që kapnin shpejtësinë e 225 km në orë. Helene pritet po ashtu të bëjë që masa të stërmëdha uji, 6 metra të larta, të përplasen mbi tokë. Autoritetet thanë se do të duheshin disa orë përpara se skuadrat e shpëtimit të mund të nisen për të ndihmuar njerëzit në nevojë. Helene është uragani i 14-të më i fuqishëm që ka goditur Shtetet e Bashkuara që kur ka filluar regjistrimi i të dhënave, dhe është i shtati më i fuqishmi që godet Floridan, sipas të dhënave nga Qendra Kombëtare e Uraganeve.