Departamenti i Shtetit ka bërë thirrje për shtetasit amerikanë në mbarë botën të tregojnë kujdes të shtuar. Ky njoftim me rëndësi është shpërndarë nga ambasadat amerikane të shumë shteteve për qytetarët përkatës, një ndër to edhe Ambasada e SHBA në Tiranë. Në njoftim thuhet se qytetarët amerikanë duhet të shmangin sa më shumë udhëtimet në drejtim të vendeve në Lindjen e Mesme për shkak se mund të zhvillohen protesta. “Paralajmërim në mbarë botën: Konflikti midis Izraelit dhe Iranit ka shkaktuar ndërprerje të udhëtimeve dhe mbyllje periodike të hapësirës ajrore në të gjithë Lindjen e Mesme. Ekziston mundësia për protesta kundër qytetarëve dhe interesave të Shteteve të Bashkuara jashtë vendit”, shkruhet në njoftimin e Ambasadës së SHBA Nxitur nga tensionet në Lindjen e Mesme, pjesë e thirrjes për kujdes të shtuar, ambasada e SHBA fton që shtetasit amerikanë të lexojnë me kujdes Travel Advisory, informacionin për vendin dhe çdo alarm sigurie të fundit përpara se të planifikojnë një udhëtim.