Planet për të kombinuar festimet për 250-vjetorin e Ushtrisë Amerikane me ditëlindjen e presidentit amerikan, me një paradë ushtarake në qendër të Uashingtonit po ngjallin habi dhe indinjatë tek politikanët vendas, të cilët kanë frikë për çmimin dhe pasojat e përfshira. 14 qershori, në SHBA konsiderohet një ngjarje historike që ia vlen të kujtohet. Që nga themelimi i saj zyrtar në 14 qershor 1775, më shumë se një vit para Deklaratës së Pavarësisë, ushtria amerikane ka luajtur një rol jetësor në rritjen dhe zhvillimin e kombit amerikan. 14 qershori është gjithashtu ditëlindja e 79-të e Presidentit Donald Trump, një rastësi të cilën Shtëpia e Bardhë nuk ka humbur kohë ta shfrytëzojë si një mundësi për të arritur dëshirën e kahershme të Trumpit për të organizuar një paradë ushtarake në rrugët e Uashingtonit. Trump u fiksua pas paradave gjatë mandatit të tij të parë kur Presidenti Francez Emmanuel Macron e ftoi si të ftuar nderi në festimet e ditës së Bastijës në Paris. Dhe që atëherë, trump, me sy të ndricuar, imagjinoi dicka në shkallë më të madhe në Pennsylvania Avenue. Deri vonë, planet e festimit të 250-vjetorit të Ushtrisë amerikane nuk përfshinin një paradë. Në vend të saj, ishin parashikuar ekspozime të pajisjeve ushtarake, shfaqje muzikore etj. Dy muaj më parë, u përfshi Trump. Dhe tani një paradë është në plan. Zyrtarisht, nuk ka të bëjë me presidentin. Festimi historik i 250-vjetorit të Ushtrisë "do të nderojë brezat e amerikanëve vetëmohues që kanë rrezikuar gjithçka për lirinë tonë", tha Shtëpia e Bardhë. Sipas dokumenteve zyrtare të planifikimit, festimi i dyfishtë përfshin pothuajse 7,000 trupa, më shumë se 120 automjete ushtarake, 25 tanke Abrams dhe 50 helikopterë. Përveç kësaj, do të ketë një shfaqje "spektakolare" fishekzjarresh, tha një zëdhënës i Ushtrisë sipas të cilit planifikimi vazhdon. Por jo të gjithë janë të kënaqur me planet. Ka nga ata që nuk e duan gjithë këtë pompozitet, ndërsa të tjerë vënë në dukje se tanket në paradë mund të shkatërrojnë rrugët e uashingtonit. Gjatë mandatit të parë të Trump, plani i tij për një paradë madhështore si ajo që pa në Francë, u hodh poshtë për shkak të kostos të madhe të vlerësuar që shkonte deri në 92 milionë dollarë. Këtë herë vlerësimi është pak më i ulët por përsëri shkon në dhjetëra e miliona dollarë. Ndërsa kritikët më të ashpër thonë se me paradën ekstravagante të tankeve, trump do të nderojë veten dhe jo ushtrinë.