Entuziastët e hapësirës do të argëtohen në fund të këtij muaji, pasi gjashtë planetë do të shfaqen afër njëri-tjetrit në qiellin e natës. Fenomeni, i njohur si paradë planetësh ose rreshtim planetar, ndodh kur të paktën katër ose pesë planetë mund të shihen së bashku, sipas NASA-s. Më 28 shkurt, vëzhguesit e yjeve do të kenë mundësinë të shohin Mërkurin, Afërditën, Jupiterin, Saturnin, Uranin dhe Neptunin të rreshtuar krah njëri tjetrit në qiell, duke e bërë këtë një shfaqje të rrallë planetare. Parada planetare ndodh sepse planetët rrotullohen rreth diellit në afërsisht të njëjtin plan të sheshtë, të njohur si plani ekliptik. Edhe pse çdo planet udhëton me një shpejtësi dhe distancë të ndryshme, ka raste kur disa prej tyre duket se rreshtohen në një vijë të drejtë kur shihen nga Toka. Rreshtimi është thjesht një efekt vizual pasi në realitet, planetët mbeten diku nga miliona deri në miliarda kilometra larg. Dicka e tillë ka ndodhur edhe më parë. Më 27 shkurt 2025, shtatë planetë, përfshirë Merkurin, Afërditën, Marsin, Jupiterin, Saturnin, Uranin dhe Neptunin, u rreshtuan në një shfaqje të rrallë që nuk do të shihet përsëri deri në vitin 2040. Sipas NASA-s, mundësitë për të parë shumë planetë mund të zgjasin nga javë në më shumë se një muaj, pasi lëvizjet planetare janë të ngadalta dhe graduale. Disa njerëz mund ta shohin rreshtimin që në këtë fundjavë, por ajo që e bën 28 shkurtin të vecantë është fakti se planetët do të jenë të grupuar më afër dhe shumë planetë mund të shihen së bashku në qiellin e mbrëmjes. Merkuri, Afërdita, Marsi dhe Jupiteri, do të jenë të dukshëm me sy të lirë. Ndërsa Urani dhe Neptuni do të kërkojnë dylbi ose një teleskop për tu parë ndërsa orbitojnë në rajonet e ftohta dhe të largëta të sistemit diellor.