Në fillim të javës së kaluar, Presidenti amerikan paraqiti një plan me 20 pika që duhet t'i japë fund luftës në Rripin e Gazës, e cila vazhdon tashmë prej dy vitesh. Pas lirimit të pengjeve, përfundimit të sulmit të Izraelit ndaj Gazës, por edhe pas çarmatimit të Hamasit, Gaza duhet të rindërtohet dhe në periudhën e tranzicionit do të qeveriset nga një qeveri ekspertësh teknikë, nën mbikëqyrjen e një organi ndërkombëtar të quajtur "Komiteti i Paqes". Ky organ do të kryesohet nga vetë Trump, ndërsa Tony Blair do të ketë një rol të rëndësishëm, gjë që ka shkaktuar kritika të ashpra. Raportuesja speciale e OKB-së për territoret palestineze, Francesca Albanese, ishte shumë e drejtpërdrejtë: "Tony Blair? Asnjë shans!” shkroi ajo në X. "Duart larg Palestinës!”, dhe shtoi: "Ndoshta duhet të takohemi në Hagë?” Albanese iu referua kështu pikës më të errët në CV-në e Blair: rolin e tij në luftën e Irakut të vitit 2003. Para saj, Blair ishte një politikan shumë i suksesshëm dhe popullor. Pasi fitoi zgjedhjet e vitit 1997, ai u bë Kryeministri i Partisë Laburiste me shërbimin më të gjatë në historinë e vendit. Por pas sulmeve terroriste të 11 shtatorit 2001 në Nju-Jork, Blair qëndroi pothuajse pa kushte në anën e Presidentit të atëhershëm amerikan, George Ë. Bush, në "luftën kundër terrorizmit". Kjo i solli atij kritika të ashpra: opozita madje e quajti "qenushi i Bushit". Sidoqoftë, vetëm një ditë pasi dha dorëheqjen si kryeministër në vitin 2007, Blair u emërua si i dërguar special i Kuartetit të Lindjes së Mesme që duhej të ndërmjetësonte mes izraelitëve dhe palestinezëve. Por edhe në këtë rol Blair u kritikua, ndër të tjera, sepse ai po zhvillonte njëkohësisht interesa të shumta private biznesi në Lindjen e Mesme. Ai e mbajti këtë pozicion për tetë vite, pa ndonjë përparim të rëndësishëm. Palestinezët e akuzuan atë se po mbante gjithnjë e më shumë anën e Izraelit. Tony Blair në vitin 2016 themeloi Institutin Tony Blair për Ndryshim Global (TBI). Përmes tij, ai këshilloi, ndër të tjerë, Presidentin e Ruandës Paul Kagame dhe Princin saudit Mohammed bin Salman. Instituti, së bashku me sipërmarrësit izraelitë, duket se kanë punuar gjithashtu për planin për rindërtimin e Gazës. Ky plan, ndër të tjera, parashikon edhe atë që quhet "Riviera Trump" dhe kur u prezantua, zemëroi shumëkënd në botë.