Pavarësisht hyrjes në fuqi të armëpushimit në Gaza më 11 tetor, situata humanitare mbetet e rëndë. Sipas të dhënave të fundit nga Organizata Botërore e Shëndetësisë që prej asaj date janë vrarë të paktën 89 persona dhe janë plagosur 317 të tjerë. Drejtori i Përgjithshëm i OBSH-së deklaroi se “kriza në Gaza është ende larg përfundimit” dhe theksoi se “nevojat e popullsisë mbeten të mëdha”. Ndërkohë, zëvendëspresidenti amerikan JD Vance, pas një vizite tre-ditore në Izrael, theksoi se Shtetet e Bashkuara nuk do të dërgojnë trupa në terren në enklavë, dhe se roli i Uashingtonit është vendimtar për ruajtjen e paqes.