Vitali Klitschko, ish-boksieri i peshave të rënda, i cili tani është kryetar bashkie i Kievit, muajin e kaluar shkeli në një territor të rrezikshëm politik: ai sugjeroi me delikatesë në një intervistë se Ukraina mund të duhet të lëshojë tokë për t'i dhënë fund luftës së saj kundër Rusisë. Pas një fluksi komentesh të zemëruara në internet, ai i tërhoqi komentet e tij, duke thënë në Facebook se "lëshimet territoriale bien ndesh me interesat tona kombëtare dhe ne duhet të luftojmë kundër lejimit të tyre deri në fund". Presidenti amerikan, Donald Trump, dhe negociatorët e tij besojnë se e vetmja rrugë për t'i dhënë fund luftës ruse në Ukrainë është që Kievi të pranojë në një farë mënyre se nuk do marrë mbrapsht tokën ukrainase që trupat e Moskës e kanë pushtuar. Por episodi me Klitschkon, së bashku me sondazhet e opinionit publik, tregojnë se pas më shumë se tre vitesh luftë, shumica e ukrainasve nuk janë të gatshëm t'i lëshojnë territor Rusisë në këmbim të një marrëveshjeje armëpushimi. Dhe mendimi i publikut ndihmon në shpjegimin pse Presidenti ukrainas Volodymyr Zelenskiy, i cili pritet të kandidojë për rizgjedhje, i ka rezistuar presionit të Trumpit për të lëshuar territor në negociatat e armëpushimit. Një sondazh i fundit tregon se pothuajse tre të katërtat e popullsisë nuk i shohin lëshimet territoriale si një mënyrë për t'i dhënë fund luftës.