Në prag të samitit të Bashkimit Europian që do të zhvillohet javën e ardhshme në Bruksel, kancelari gjerman Friedrich Merz u bëri thirrje vendeve të BE-së që të përmbushin me më shumë energji rolin e Europës si “fuqi e paqes”. Në deklaratën në Bundestag, Merz theksoi se Europa duhet të përdorë më me vendosmëri mundësitë e saj politike dhe ekonomike për të ndikuar në ndërtimin e një bote më të mirë. Ai paralajmëroi se kontinenti duhet të forcojë gjithashtu edhe kapacitetin e vet ushtarak. Një nga temat kryesore të samitit do të jetë propozimi i Merzit që pasuritë e ngrira ruse, në vlerën e rreth 140 miliardë eurove, të përdoren për të armatosur Ukrainën dhe për ta ndihmuar atë në luftën mbrojtëse kundër agresionit rus. Kancelari paralajmëroi gjithashtu një plan të ri aksioni kundër kërcënimeve hibride nga Rusia, që përfshin mbrojtjen nga sabotimet, sulmet kibernetike dhe fushatat dezinformuese.