Papa Francesku përsëriti thirrjen drejtuar presidentit rus, Vladimi Putin që të ndalë menjëherë luftën në Ukrainë, duke i dhënë në këtë mënyrë fund spirales së dhunës dhe vdekjeve në këtë vend. Apeli i Papës erdhui gjatë lutjeve të së dielës në Sheshin e Shën Pjetrit në Vatikan, në një prej deklaratave më të forta që ai ka bërë qëkur Rusia nisi pushtimin e Ukrainës më 24 shkurt. “Apeli im i drejtohet fillimisht presidentit të Federatës Ruse, duke iu lutur atij që të ndalë – për hir të popullit të tij – këtë spirale të dhunës dhe vdekjes. Në anën tjetër, i pikëlluar nga vuajtjet e mëdha të popullit ukrainas pas agresionit, i drejtohem me një apel presidentit të Ukrainës që të jetë i hapur për propozime serioze të paqes”, u shpreh Papa. Lideri i Kishës Katolike po ashtu dënoi rrezikun në rritje të një lufte bërthamore, duke e quajtur “absurde”. Komentet e Papës vijnë dy ditë pasi Rusia aneksoi katër rajone të Ukrainës, që janë pjesërisht të pushtuara nga forcat ruse.