Kreativiteti, fryma rinore, mesazhet e spikatura, pankartat e frymëzuara nga memet, diferencuan revoltën qytetare në mbrojtje të Zvërnecit që tashmë cilësohet nga protestuesit si ‘Revolucioni i Flamingove’. Mes pankartave të protestuesve nuk mungojnë ato në gjuhën angleze që i drejtohen vajzës së presidentit amerikan, Ivanka Trump dhe që kanë bërë xhiron e rrjetit duke u publikuar gjërësisht edhe në mediat prestigjoze amerikane. Mesazhet të tilla si: Ivanka mbaj duart larg Nartës apo Ivanka shko në shtëpi, janë në thelb të protestës që kundërshton investimin amerikan në Zvërnec. Fillesa e revoltës ambjentaliste ishte investimi në peisazhin e mbrojtur të Zvërnecit, por më pas zemërata qytetare u intensifikuar pas publikimit të videos ku një roje private tërhiqte zvarrë një protestues. Kështu kauza e kësaj revolte shkoi më tej me kërkesa për rrëzimin e gjithë kastës politike. Përmes pankartave të rinj e të reja shfaqen të papërfaqësuar si duhet dhe të zhgënjyer nga politikanët që kanë dominuar tre dekadat e fundit: Edi Rama dhe Sali Berisha. Duke përdorur inteligjencën artificiale dhe kreativitetin, protestuesit shfaqin në pankarta portretin e Ramës e Berishës duke i piktuar ata si plaçkitës së tokave shqiptare.