Rreth 160,000 njerëz në rajonin verilindor të Katalonjës në Spanjë u paralajmëruan të qëndronin brenda shtëpive të tyre të shtunën, pasi një zjarr në një zonë industriale shkaktoi një re toksike klori mbi një zonë të gjerë, thanë shërbimet e emergjencës. Zjarri në një kompani produktesh për pastrimin e pishinave filloi në orën 2.20 të mëngjesit në një qytezë që ndodhet 48 kilometra në jug të Barcelonës dhe shkaktoi një re të madhe me tym klori mbi zonë. "Nëse jeni në zonën e prekur, mos dilni nga shtëpia ose vendi juaj i punës", tha shërbimi i Mbrojtjes Civile në faqen e mediave sociale X. Askush nuk është lënduar në zjarr, thanë shërbimet e emergjencave në katalonjë të shtunën, por banorëve në pesë qytete iu dërgua një mesazh në telefonat e tyre celularë duke u kërkuar të qëndronin brenda. "Është shumë e vështirë që klori të marrë flakë, por kur ndodh kjo, është shumë e vështirë ta shuash", tha pronari i zonës industriale për mediat lokale. Sipas tij, shkaku i zjarrit mund të ketë qenë një bateri litiumi. Trenat që duhej të kalonin nëpër zonë u ndalën, rrugët u bllokuan dhe evente të tjera të planifikuara u anuluan. Sipas një zëdhënësi të mbrojtjes civile, zjarri u vu nën kontroll por presidenti katalanas Salvador Illa paralajmëroi se urdhri për të qëndruar në shtëpi do të mbetej në fuqi derisa të mos kishte "asnjë rrezik për popullsinë".