Ky është momenti tronditës kur dy avionë luftarakë shoqërojnë një fluturim të American Airlines, pas një kërcënimi për bombë në ajër. Fluturimi që u ngrit nga Aeroporti JFK në Neë York City dhe ishte i drejtuar për në Nju Delhi, Indi, bëri një kthesë dhe u ul në Romë për shkak të një "çështjeje të mundshme sigurie", tha linja ajrore. American Airlines konfirmoi problemet e Fluturimit 292 të dielën, dhe sipas saj kur avioni po fluturonte pranë Turkmenistanit u mor një kërcënim për bombë. Pamjet e avionit gjigant e tregojnë atë duke fluturuar mes dy avionëve luftarakë eurofighter të forcës ajrore italiane, përpara se të ulej në aeroportin Leonardo da Vinci të Romës. Në një video tjetër, një grup njerëzish janë duke parë të tmerruar teksa avioni u ul në pistën e aeroportit, me avionët luftarakë që e ndiqnin nga afër. Avioni ishte nisur rreth orës 20:30 të së shtunës dhe po udhëtonte mbi Detin Kaspik kur linja ajrore paralajmëroi ekuipazhin për një kërcënim me bombë, thonë burimet. Ai u kthye mbrapsht dhe përfundimisht u ul në Romë, Itali, rreth tre orë para se të mbërrinte në Indi. Zyrtarët thanë se kërcënimi për bombë kishte ardhur me email. Alarmi më vonë u përcaktua si "jo i besueshëm", tha linja ajrore. Mediat amerikane raportuan se autoritetet indiane kishin kërkuar që avioni të kontrollohej para uljes në Nju Delhi. Zëdhënësi i aerportit të romës konfirmoi se kontrollet e sigurisë u kryen sapo pasagjerët dhe ekuipazhi u evakuan nga avioni. American Airlines është ende e tronditur nga momenti kur avioni i saj u përplas me një helikopter mbi Uashington DC, pavarësisht se ishte një natë e kthjellët, duke i marrë jetën 67 personave në bord. Kutitë e zeza që mund të mbajnë të dhëna të rëndësishme për të zbardhur aksidentin janë nxjerrë nga mbetjet e avionit në lumin Potomac, por hetimi i rastit nuk ka përfunduar ende.