Një avion i linjës 'Alaska Airlines', i cili po udhëtonte drejt San Franciskos, u detyrua të ndërrojë drejtim duke u ulur në Portland të Oregonit, pas një tentative për fikjen e motorëve të tij. Incidenti u shkaktua nga një pilot, i cili kishte mbaruar detyrën dhe ndodhej në një nga sediljet, pranë kabinës së pilotit. Sipas BBC, piloti i fluturimit 2059 i ‘Alaska Airlines’ që operohet nga ‘Horizon Air’, kërkoi devijimin e avionit, duke njoftuar mbi një situatë që kërcënonte sigurinë e avionit. Agjencia e lajmeve ‘Reuters’ duke iu referuar një njoftimi të Administratës Federale të Aviacionit, bëri të ditur se individi, kërkoi të çaktivizonte motorët, duke aktivizuar sistemin e fikjes së zjarrit. Në njoftim thuhej se ekuipazhi i avionit ia doli ta bllokonte atë dhe ta mbante sa më larg kabinës së pilotit. Sipas autoriteteve të linjës ajrore 'Alaska Airlines', motorët nuk u çaktivizuan në asnjë moment. Dyzet e katërvjeçari Joseph David Emerson, përballet tani me 83 akuza për tentativë për vrasje dhe rrezikim të një avioni. Emerson është një pilot i çertifikuar i cili një muaj më parë kishte kryer të gjitha testet mjekësore për vazhdimin normal të punës. Administrata Federale e Aviacionit tha në një njoftim të vecantë se incidenti "nuk ishte i lidhur në asnjë mënyrë apo formë me ngjarjet aktuale në botë", por shtoi se "në të gjitha rastet, duhet ruajtur vigjilenca".