Presidenti i Shteteve të Bashkurara të Amerikës Joe Biden konstatoi: "Pandemia ka mbaruar. Ne ende kemi një problem me Coronën. Ne ende jemi duke punuar shumë në luftimin e këtij virusi, por pandemia ka mbaruar", deklaroir 79-vjeçari në një intervistë për emisionin "60 Minutes", të televizionit CBS. Intervista është regjistruar të enjten, kur presidenti Biden vizitoi ndër tjera edhe një panair makinash në Detroit. "Siç mund ta shihni, askush këtu nuk mban maskë. Të gjithë duket se janë në formë mjaft të mirë, kështu që mendoj se situata po ndryshon dhe mendoj se ky është një shembull i përsosur i asaj që po ndodh", theksoi presidenti. Deklarata e presidentit Biden mund të shkaktojë trazira brenda vet administratës së tij. Vetëm pak javë më parë, qeveria amerikane i kërkoi Kongresit miliarda dollarë shtesë për të luftuar pandeminë, në mënyrë që të mund të vazhdojë të ofrojë teste dhe vaksinime, gjatë një vale të mundshme të koronavirusit në vjeshtë. Megjithatë, kufizimet për shkak të virusit në SHBA janë hequr në masë të madhe. Edhe lëvizjet dhe udhëtimet janë kthyer gati në niveliet e para pandemisë. Vetë presidenti Biden ka rezultuar pozitiv ndaj koronavirusit në korrik të këtij viti dhe është trajtuar me ilaçin kundër COVID-it, Paxlovid. Në fund të gushtit, gruaja e tij Jill u infektua po ashtu me këtë virus dhe u trajtua me të njëjtin ilaç. Sipas agjencisë amerikane të shëndetësisë CDC, pothuajse 400 persona vdesin çdo ditë në SHBA nga covidi.