Sekretari amerikan i Shtetit, Marco Rubio, vizitoi Kanalin e Panamasë më 2 shkurt, nga ku e paralajmëroi Panamanë se Uashingtoni do të “ndërmarrë masa të nevojshme”, nëse ajo nuk kufizon përfshirjen e Kinës në rrugën e rëndësishme ujore. Presidenti i Panamasë, Jose Raul Mulino, duket se i mori seriozisht kërcënimet, pasi tha se i ka adresuar shqetësimet e Uashingtonit për ndikimin e supozuar të Pekinit duke mos e rinovuar marrëveshjen e Panamasë për t'u bashkuar me nismën kryesore të Kinës, Brezi dhe Rruga (BRI). Mulino gjithashtu njoftoi hapa të mëtejshëm për të bashkëpunuar për imigracionin, një çështje e rëndësishme politike për administratën amerikane. Megjithëse Mulino i tha Rubios se sovraniteti i Panamasë mbi kanalin është i padiskutueshëm, ai gjithashtu tha se i adresoi shqetësimet e Uashingtonit në lidhje me ndikimin e supozuar të Pekinit mbi rrugën ujore. Vendimi për të mos rinovuar memorandumin e mirëkuptimit të vitit 2017 për t'u bashkuar me BRI-në shënon një hap të hershëm për t’i zbutur shqetësimet e Uashingtonit për ndikimin kinez në Panama. BRI-ja është nisma kryesore e politikës së jashtme të liderit kinez Xi Jinping, dhe ky projekt global i infrastrukturës ka çuar në investime kineze në vlerë qindra miliarda dollarë në mbarë botën. Zëdhënësja e Departamentit të Shtetit, Tammy Bruce, tha se Rubio i përçoi një mesazh nga presidenti Donald Trump, duke theksuar se prania e Kinës është kërcënim për rrugën ujore dhe e shkel traktatin SHBA-Panama. Trump ka thënë se nuk e përjashton përdorimin e forcës ushtarake kundër Panamasë. Këto deklarata i kanë shqetësuar shumë aleatë të SHBA-së në Amerikën Latine dhe më gjerë. Trump pretendoi madje më herët se "Kina është ajo që udhëheq Kanalin e Panamasë". "Ai nuk iu dha Kinës, iu dha Panamasë – në mënyrë të pamenduar – por ata e shkelën marrëveshjen. Ne do ta rimarrim Kanalin e Panamasë, ose diçka shumë e fuqishme do të ndodhë", u tha Trump gazetarëve. "Nuk mendoj se do të jenë të nevojshme trupa ushtarake në Panama", shtoi ai. Trump foli gjithashtu edhe për mundësinë që Shtetet e Bashkuara ta blejnë ishullin e Grenlandës nga Danimarka, pavarësisht se ajo ka thënë se nuk është në shitje. Trump sugjeroi po ashtu se Kanadaja duhet të bashkohet me Shtetet e Bashkuara. Por, serioziteti i këtyre komenteve nuk është i qartë.