Organizata Amnesty International ka shprehur shqetësim për marrëveshjen mes Italisë dhe Shqipërisë për emigrantët. Sipas kësaj organizate “skema për ndërtimin e qendrave të ndalimit të emigrantëve në Shqipëri është pjesë e një tendence më të gjerë ndërkombëtare për të zhvendosur kontrollin kufitar dhe përpunimin e azilit në vendet e treta: një lëvizje që kërcënon të drejtat e njeriut të migrantëve dhe refugjatëve. Matteo de Bellis, hulumtues për Migracionin dhe Azilin pranë organizatës vlerëson se “kjo marrëveshje përfaqëson një tjetër përpjekje të turpshme nga Italia për të anashkaluar ligjin ndërkombëtar dhe të BE-së”, shkruan në një artikull Zëri i Amerikës. Deklarata e organizatës thekson se kjo marrëveshje mund të dobësojë gjithashtu sistemin më të gjerë të kërkimit dhe shpëtimit, që mund të rrezikojë sigurinë e njerëzve që kanë nevojë për shpëtim në det.