Ministri i mbrojtjes i Pakistanit tha të shtunën se nuk ishte planifikuar asnjë takim i organit më të lartë ushtarak dhe civil që mbikëqyr arsenalin bërthamor të vendit pas një operacioni ushtarak kundër Indisë më herët gjatë ditës. Ushtria e Pakistanit tha se kryeministri kishte thirrur autoritetin për t'u takuar. Ministri i informacionit nuk iu përgjigj menjëherë një kërkese për koment. Përplasjet më të ashpra mes rivalëve të armatosur me armë bërthamore që nga viti 1999 kanë vrarë dhjetëra njerëz nga të dyja palët dhe kanë çuar në thirrje të përsëritura për shtensionimin e situatës nga Shtetet e Bashkuara dhe grupi i vendeve të pasura G7. "Kjo për të cilën keni folur, opsioni bërthamor, është e pranishme, por le të mos flasim për të - duhet ta trajtojmë si një mundësi shumë të largët, nuk duhet ta diskutojmë as në kontekstin e menjëhershëm," tha Ministri i Mbrojtjes i Pakistanit për një televizion vendas. "Para se të arrijmë në atë pikë, mendoj se temperaturat do të ulen. Nuk është mbajtur asnjë takim i Autoritetit të Komandës Kombëtare, as nuk është planifikuar një takim i tillë", shtoi ai. Sekretari amerikan i Shtetit, Marco Rubio, telefonoi Shefin e Ushtrisë së Pakistanit dhe ministrin e Jashtëm të Indisë, duke i nxitur ata që të punojnë për të ulur tensionet dhe të "rivendosin komunikimin e drejtpërdrejtë për të shmangur keqllogaritjet". Delhi ka thënë se qasja e Indisë ka qenë gjithmonë e matur dhe e përgjegjshme dhe mbetet e tillë ndërsa pakistani tha se nëse india ndalet këtu edhe ai do të bëjë të njëjtën gjë. Mediat indiane ndërkohë kanë raportuar se zyrtarë nga të dyja vendet kanë folur të shtunën.