Mbi 165.000 afganë janë larguar nga Pakistani gjatë këtij muaji, që kur Islamabadi lëshoi një ultimatum për 1.7 milion persona që të largohen ose do të përballen me arrestim apo dëbim. Shumica janë larguar ditëve të fundit, pasi afati i fundit ishte 1 nëntori dhe policia nisi të hapte dhjetëra qendra ndalimi për të dërguar afganët e arrestuar. Zyrtarët në pikën kufitare Torkam në provincën Kiber Paktunkva, punuan mëngjesin e të enjtes në mënyrë që të kalonin makina me 28.000 persona. Kolona e makinave ishte e shtatë kilometra e gjatë.Autoritetet në Pakistan kanë inkurajuar afganët që nuk kanë dokumente qëndrimi që të largohen në mënyrë vullnetare, ndërsa policia ka nisur operacionet e kërkimit. “Afganët ilegalë kanë arritur në Torkam dhe numri ka qenë i madh për shkak të afatit. Njerëzit edhe sot po largohen në mënyrë vullnetare”, thanë zyrtarët në kufi.Miliona afganë u vendosën në Pakistan dekadat e fundit për shkak të dhunës në vendin e tyre. Vlerësohet se 600.000 afganë janë larguar që kur talibanët morën pushtetin në gusht të vitit 2021 dhe vendosën kufizime të ashpra.Pakistani tha se dëbimi i afganëve po bëhej për të mbrojtur “sigurinë” e vendit, pasi së fundi janë rritur ndjeshëm sulmet, për të cilat Qeveria pakistaneze ka fajësuar militantët që operojnë nga Afganistani. Ambasada afgane në Islamabad tha se ky vendim do të dëmtojë edhe më tej raportet mes dy shteteve fqinje. Grupet për të drejtat e njeriut kanë akuzuar Qeverinë pakistaneze se po përdor kërcënimet, abuzimet dhe ndalimet për të detyruar azilkërkuesit afganë të largohen, ndërsa grupet kanë raportuar se javët e fundit ka patur arrestime arbitrare të afganëve.