Kryeministri i Pakistanit, Shebaz Sharif, ka premtuar se do të kundërpërgjigjet, pas sulmeve ajrore të Indisë, që lanë të vdekur dhjetëra persona, ndërsa tensionet mes dy fuqive bërthamore, kërcënojnë të përshkallëzohen edhe më shumë.Takimi i Komitetit Kombëtar për Siguri i Pakistanit, të mërkurën, përfundoi me vendimin për të autorizuar ushtrinë e shtetit që të kundërpërgjigjet. “Komiteti Kombëtar për Siguri i bën thirrje komunitetit ndërkombëtar të njohë peshën e veprimeve të paprovokuara dhe të paligjshme të Indisë dhe ta konsiderojë atë përgjegjëse për shkeljen flagrante të normave ndërkombëtare dhe ligjeve”, u tha në deklaratën e lëshuar nga zyra e Sharifit. Në njoftim u shtua se India “edhe një herë ka ndezur zjarr në rajon”. Disa orë para këtij njoftimi, forcat indiane goditën shënjestra në mbarë Kashmirin e administruar nga Pakistani, dhe në provincën Punxhab të Pakistanit. India tha se kreu sulme “precize” kundër “terroristëve” pas një sulmi në Kashmirin e administruar nga India, dy javë më parë, ku u vranë 26 turistë hindu.