Deputetja demokrate, njëherësh edhe Kryetarja e Komisionit për Kulturën, Turizmin dhe Diasporën Ina Zhupa, ka reaguar ashpër ndaj ‘Paketës së Maleve’, duke e cilësuar si “paketa e tjetërsimit të pronës private” që favorizon klientelën në kurriz të qytetarëve. ‘Paketa e maleve ose paketa e tjetërsimit të pronës private. Për ata që nuk kanë para të investojnë në pronat e tyre, për ata që nuk ndërtojnë dot resorte, agroturizëm apo çdo lloj aktiviteti tjetër ekonomik, për ata nuk ka pronësi. Për ata nuk ka toka! Vetëm të pasurit, ata që kanë para të investojnë, ata që janë miqtë e Edi Ramës. Ata mund të gëzojnë, përveç tokave publike që ua dhanë për një copë buke, tanimë do t’u japin edhe tokat private, me justifikimin se këta i punojnë. Ky është fundi i shtetit ligjor!’ Sipas Zhupës, nisma për “Paketën e Maleve”, e prezantuar fillimisht si një projekt për zhvillimin dhe rivitalizimin e zonave malore, është shtrirë në mënyrë abuzive edhe në fusha, kodra dhe bregdet, duke rrezikuar të drejtat e pronarëve që nuk kanë mundësi ekonomike për të investuar. Ajo thekson se kjo qasje përbën një goditje ndaj shtetit ligjor dhe cenon rëndë të drejtën e pronës, duke e cilësuar të gjithë procesin si “vjedhje të madhe” në dëm të qytetarëve.