Bashkimi Evropian ka hedhur poshtë propozimin e presidentit rus Vladimir Putin për përfshirjen e ish-kancelarit gjerman Gerhard Schröder si ndërmjetës në bisedimet për paqe lidhur me luftën në Ukraina. Putin e shprehu propozimin pak ditë më parë, ndërsa përfaqësuesja e lartë e BE-së për politikën e jashtme, Kaja Kallas, deklaroi në Bruksel se Schröder nuk mund të konsiderohet një figurë e paanshme për shkak të lidhjeve të tij të mëparshme me kompanitë shtetërore ruse. Ajo tha se është e papranueshme që Rusia të propozojë një përfaqësues në emër të Evropës në një proces negociues kaq të ndjeshëm. “Një ndërmjetës duhet të jetë i pavarur dhe i besueshëm. Lidhjet e ngushta të Gerhard Schröder me sektorin energjetik rus e bëjnë të pamundur një rol të tillë”, theksoi Kallas. Ish-kancelari gjerman ka mbajtur më parë poste drejtuese në kompani të lidhura me projektet strategjike energjetike ruse dhe është kritikuar vazhdimisht për qëndrimet e tij të buta ndaj Moskës. Ai gjithashtu nuk e ka dënuar në mënyrë të drejtpërdrejtë pushtimin rus të Ukrainës. Të njëjtin qëndrim kanë mbajtur edhe zyrtarë të tjerë europian që e kanë cilësuar ish-kancelarin gjerman si një figurë të papërshtatshme.