Në dy vitet e fundit konsumi në Shqipëri është nxitur kryesisht nga rritja e pagave, udhëhequr nga reforma e rrogave në administratën publike dhe më pak nga rritja e tyre në sektorin privat. Por, Banka e Shqipërisë thekson anën tjetër të medaljes, rrezikun që rritja e vazhdueshme e pagave të nxisë rritjen e çmimeve në të ardhmen e afërt. Në raportin tremujor të politikës monetare, Banka evidenton treguesit pozitivë në tregun e punës, ku të dhënat tremujore tregojnë rritje me 3.4 për qind të punësimit në sektorin privat jobujqësor, uljen e papunësisë në 8.5 për qind dhe rritjen e pagës me 9.5 për qind. Këto zhvillime, thotë Banka, kanë mbështetur fuqinë blerëse të familjeve, por ato kanë rritur njëkohësisht kostot e prodhimit, duke vijuar të jenë një burim rreziku për rritjen e presioneve inflacioniste në të ardhmen. Inflacioni shënoi një rritje të lehtë në tremujorin e tretë, duke arritur një nivel mesatar prej 2.4 për qind, nga 2.3 për qind dhe 2 për qind, në dy tremujorët e parë të këtij viti. Banka e Shqipërisë thekson se presionet e brendshme inflacioniste janë forcuar, në pasqyrim të zgjerimit të aktivitetit ekonomik, kushteve të shtrënguara në tregun e punës, si dhe rritjes së çmimit të qirave.